Hamasei bertsolarik hartu dute parte 26. edizioan: Enaitz Zestau, Ekhiñe Zapiain, Manu Goiogana, Etxahun Azkarraga, Ioar Tainta, Egoitz Gorosterrazu, Xabi Maia, Bittor Elizagoien, Jon Silveira, Alaitz Rekondo, Julen Zelaieta, Manolo Arozena, Mizel Mateo, Iban Garro eta Karlos Aizpurua.
Berako Espidobaita elkartean hasi zuten eguna. Bertan bazkaldu eta bertsotan aritu ziren denak, eta arratsaldean Lesakan izan zuen bertso bestak segida. Antoiu ostatuan Eztakigu taldeak Tuku Tuki taldea menderatu zuen bertan. Teleboten jokaturiko bigarren finalerdian berriz, Hiruzpalau taldeak lortu zuen finalerako txartela, Ortzeguntakuk taldearen kontra nagusitu ondotik.
Ohikoa duten gisan, Arrano ostatuan egin zuten finala afalondoan. Mizel Mateok, Iban Garrok, Karlos Aizpuruak eta Egoitz Elizagoienek osaturiko Hiruzpalau taldeak lortu zuen azkenean garaipena, eta bigarren gelditu zen Manu Goioganak, Etxahun Azkarragak, Enaitz Zestauk eta Ioar Taintak osaturiko Eztakigu taldea. Kotto Saria Mizel Mateok eskuratu zuen. Bidarraitarrak Manu Goiogana, iazko irabazlearen eskutik jaso zuen Josu Goia zenak egindako garaikurra. Gai jartzen eta epaitzen, berriz, Bortzirietako Bertso Eskolako kideak aritu ziren.
Giro ederrean pasa zuten eguna, eta 80 lagun inguru bildu ziren afaria eta afalondoko finalean.