Lehenengo fasean teilatua berritu zen eta bigarren fasean eraikina kanpotik berriztatu, eta barreneko aldea museo modura prestatu da. 2026ko erronka, zentro honen kudeaketa antolatzea izanen da. Etxalarko Udala idekia dago edozein proposamen jasotzeko. Herriaren historia, usategiak eta usazaleak, herritarren ohiturak, ingurumena eta bertako altxor guztiak Etxalartik mundura zabaltzeko espazioa izatea da helburua. Bisita eremu soilaz haratago, herritarren parte hartzean eta dibulgazioan oinarritutako espazio bizia izatea da nahia. Inguruko hegaztiak, sare bidezko uso harrapaketa tradizionalaren ohitura, migrazioa, kontrabandoa, ingurumen balioa, mugaren historia eta bertze hainbat gaien inguruko informazio mardula topatu daiteke bertan.
Lizarieta kaskoko bi karpak jendez leporaino beteta, Abata Etxalarko Usategiei buruzko film labur dokumentalaren aurrestreinaldia ere izan zen segidan. Joseba Iratzokiren doinuek borobildu zuten ekitaldia eta Etxalarko Udalak eskainitako luntxarekin eman zitzaion akabera egunari