Deñe Abuin lesakarra saritu dute Nafarroako merkataritzaren lehen galan

Ttipi-Ttapa 2025eko abenduaren 12a

Deñe Abuin eta Denok Bat Federazioko zuzendaritza batzordeko kideak, Mikel Irujo kontseilariarekin, Baluarteko oholtzan.

Nafarroako komertzioaren lehen gala ospatu zen asteazkenean Iruñeko Baluarten eta Kattagorria dendaren sortzaile den Deñe Abuin Arrasate lesakarrak saria jaso zuen Mikel Irujo Nafarroako Gobernuaren Industriako eta Enpresen Trantsizio Ekologiko eta Digitalerako kontseilariaren eskutik, komertzio ttikiaren alde egindako lanarengatik.

Kattagorria dendan 36 urtez egindako lana ez ezik, Denok Bat Federazioan egindakoa ere baloratu dute

Ekitaldi honetan Deñe Abuinen irmotasuna aitortu dute, 36 urtez bere lentzeria eta moda negozioa zuzendu baitu Lesakan. Gainera, merkataritzan euskara bultzatzea eta Denok Bat Federazioaren proiektu guztietan modu grinatsu eta desinteresatuan lan egitea baloratu dute. Hain zuzen, Denok Bat Federazioko zuzendaritza batzordea ere igo zen Baluarteko oholtzara.

Deñe Abuin, saria hartzen Mikel Irujo kontseilariaren eskutik.

Sari honen harira, Lesakako Udalak ere Gurekin Zerbitzuen Elkartean egindako lana ere aitortu nahi du, «merkataritza-asoziazionismoaren aldeko defentsan».

Ekonomia Bortziriak Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun