Sareetan 537 uso harrapatuta bukatu dute Etxalarko Usategietako ehiza denboraldia

Ttipi-Ttapa 2025eko abenduaren 10a

Etxalarko usazaleak larunbatean Oxkixeko lepoan egin zen anaitasun bazkarian.

Sareetan 44 dozena eta 11 uso harrapatuta bukatu dute Etxalarko Usategietako ehiza denboraldia: guztira 537 uso. Sasoia, indartsu hasi zen, sareak jarri eta laugarren egunean, urriaren 7an, 25 dozena ehizatu baitzituzten. Urriko bigarren hamabostaldian eta azaroko lehen astean hego haize bortitza nagusitu zen, eta uso gehienek kostaldetik joatea erabaki zuten. Ez dira uso gutiago pasa, pasa direnak Urruñatik pasa dira, milioi bat uso baino gehiago pasa baitira. Hala ere, Iparraldean sarearekin ehizatzen duten bertze zortzi herriekin egiten den sare bidezko ehizaren zenbaketa orokorrean, bigarren saretik 30 usotara geratu da Etxalar, hirugarren postuan.

Abenduaren 6an Oxkixeko lepoan egin zuten usazaleen anaitasun bazkaria

Abenduko lehen larunbatean sareekin ehizatzen duten usategiek anaitasun bazkaria egin zuten abenduaren 6an egin zuten Oxkixeko lepoan, Nafarroa Behereko Donaixti-Ibarre eta Zuberoako Muskildiren arteko mugan.

Sasoi bukaeran elurra ere izan zuten Etxalarko usategietan.

250 usori eraztunak

CPALeko ekologistek, duela zazpi urte hasi zuten eraztun kanpainarekin segituz, aurten 250 usori eraztunak paratu dizkiete (pasa den urtean 100 izan ziren). Proiektu honekin Etxalartik pasatzen diren usoak norantz doazen ikusi nahi da. Aurten, bitxikeria gisa, uso mezulari bat harrapatu dute.

Gizartea Bortziriak Etxalar

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun