12.000 kilo egur, astebetean egindako lan ikusgarria
Aurten ere, inguruko basoetatik bildutako 12.000 kilo egur erabili dira txondorra sortzeko. Karlos Sein eta Etxahun Azkarraga ikazkinek astebeteko lanari esker eraiki dute egitura, eta piztu ondotik IrriSarri Landeko boluntarioek zainduko dute etengabe. Aurreikuspenen arabera, 5.000 kilo ikatz inguru lortuko dira urtea bukatu baino lehen. Txondorra eta ikaztegia abendu osoan bisitatzeko aukera izanen da.
Fermin Muguruza: euskal kulturaren ikur bati omenaldia
Ekitaldiko unerik bereziena Muguruzaren esku txondorra piztu denekoa izan da. Kortatu, Negu Gorriak, Dut edota Brigadistak Sound System bezalako taldeetan egindako lanetik hasi eta Black is Beltza filmak zuzendu arte, Muguruzaren ibilbideak oihartzun handia du. Aurkezleak elkarrizketa labur bat egin dio, bere sormen-bidaiaz eta euskararen aldeko konpromisoaz hitz egiteko. Muguruzak gogoratu zuenez, «1984an hasi nintzen musika egiten, Kortatu taldearekin eta, urte berean, Montxo Armendarizek Tasio filma zuzendu zuen, ikazkin baten historia».