2026tik aitzinera feriak ortzegunean edo ortziralean egitea erabakiko dute hamasei urtetik goitiko lesakarrek
Lesakako Udalak herritar guztiak bozkatzera animatu nahi ditu, ahalik eta lesakar gehienen iritzia jaso ahal izateko, eta ordutegi zabala prestatu du horretarako, ahalik eta jende gehienak bere iritzia emateko. Honela, azaroaren 30ean, igandean 10:00etatik 14:00etara eta 16:00etatik 20:00etara izanen da bozketa Lesakako herriko etxean. Botoa eman behar duen pertsona identifikatzeko Nortasun Agiria, NIE, gidabaimena edo pasaportea eraman beharko da. Ezin izanen da posta bidez edo Internet bidez bozkatu.