85 eta 90 urte bete dituzten bazkideak omentzeaz gain, urte osoan egindako txapelketetako sariak banatu zituzten igandean
Ospakizuna hasteko, Ioritz Iriarte Azpiroz dantzari gazteak Aurreskua bikain dantzatu zien omenduei Alondegian. 85 urtekoak Maria Teresa Martinez, Margarita Susperregi, Begoña Orube, Bixenta Ferrero eta Jean Mesplé ziren eta 90 urtekoen artean, Juanita Almandoz, Kontxi Iantzi, Asun Fagoaga eta Maria Luisa Portu. Denek ez zuten ekitaldira agertzerik izan, baina denentzat izan zen Aurreskua. Oroigarriak ere eman zizkieten omenduei.
Txapelketetako irabazleak
Gero, bazkaria izan zuten jubilatuen jatetxean eta bazkalondoan dantzaldia eta txapelketetako sari banaketa egin zuten. Ibilaldi arautuan Dolores Albizu, Nekane Catalan eta Maria Jose Garcia izan ziren saridunak; tokan, Alfonso Feito; arku eta itu-pilotetan, Jose Manuel Curto; bolan, Noemi Vaquero; igelan, Nekane Catalan, eta, uztaietan, Antton Guruchet.