Ontziek barrenean duten produktuak kudeatu nahi dituzte, beraz, ontzi hutsak edukiontzi horira botatzen segitu behar da
Zigilua kentzen eta Garbigune Ttikia inauguratzen lagundu zuten Tantirumairu ikastolako ikasleek irailaren 18an eta, beraz, dagoeneko Lesakako herritar guztiek erabil dezakete. Argazkian ageri den bezala, Garbigune Ttikia bisitatu zuten eta interes handia erakutsi zuten zerbitzu berriak nola funtzionatuko duen eta zer hondakin bota ahal izanen diren jakiteko.
Onartutako hondakinak
Aerosolak (likidoarekin), bateriak, bonbillak eta fluoreszentak, CDak eta DVDak, fitosanitarioak, garbiketa produktuak, gasolio/olio filtroak, kolak eta silikonak, kutsatutako ontziak, olio begetala, olio minerala, pilak, pinturak, erradiografiak, toner eta inprimagailuko tintak eta tresna elektrikoak eta elektronikoak bota daitezke.
Bortzirietako Hiri Hondakinen Mankomunitateak eskertuko luke hondakinak ongi bereizi eta dagokien lekuan uztea, Mankomunitateko langileen lana errazteko. Bertzela, denbora aunitz behar da hondakin txiki horiek banan banan bereizteko, gero behar bezala kudeatu eta birziklatu ahal izateko.
Ontzi hutsik ez
Hori bai, gogoratu behar da plastiko, metal edo brik ontzi hutsak edukiontzi horira bota behar direla, orain arte bezala. Barrenean likidoa duten aerosolak, pintura duten potoak, garbiketa produktuak dituzten ontziak eta gisa horretakoak baino ez dira utzi behar Garbigune Ttiki honetan.
Zerbitzu berri honekin ontziek barrenean duten produktu kutsatzailea kudeatu nahi dute, ez ontzia bera. Beraz, hutsik badaude, edukiontzi horira bota.