Nafarroen Ikastolen Elkarteko ikastoletan hezkuntza berezian diharduten profesionalei laguntza eta aholkularitza espezializatua emateko
Sinatutako akordioak Egiturentzako Laguntza Espezializatuko Zerbitzua (SAEE) ematea ezartzen du. Zerbitzu horri esker, Nafarroako Kutxa Fundazioaren Isterria Hezkuntza Bereziko Zentroak zentro arruntentzako erreferentzia eta laguntza zentro gisa jardun ahal izanen du. Hitzarmen honek bi urteko iraupena izanen du hasiera batean, eta bi erakundeek hezkuntza-inklusioa eta aniztasunarekiko arreta hobetzeko duten konpromisoa sendotzen du. Nafarroako Kutxa Fundazioak hezkuntza espezializatuaren arloan egindako ibilbide luzea eskaintzen dio proiektu honi, hezkuntza premia bereziak dituzten pertsonen garapena eta autonomia bultzatuz Iberoko Isterria hezkuntza bereziko zentrotik.
Josu Reparazek, Nafarroako Ikastolen Elkarteko zuzendariak adierazi duenez, «Isterriaren laguntza espezializatuak ikastolen lana indartuko du premia espezifikoak dituzten ikasleei laguntzeko, eredu inklusibo eta kalitatezkoaren barruan. Eredu horretan, ikasgelako aniztasuna elkarrekin bizitzen ikasteko aukera bat da, ez oztopo bat, eta inklusioak ikasle guztiek ikasteko eta kide izateko eskubidea izatea bermatzen du».
«Hitzarmen hau ikastetxeen artean ezagutza eta esperientzia partekatzeko aukera bat da, Nafarroako hezkuntza-sistema osoari mesede egiten dioten lankidetza sareak sortuz», nabarmendu du Nafarroako Kutxa Fundazioko presidente Jose Angel Andrések.
Hitzarmen hau sinatzea Nafarroako Kutxa Fundazioak Nafarroako gizarte eta hezkuntza erronkei erantzuteko lurraldeko eragileekin lankidetzan aritzeko egin duen apustu estrategikoaren barruan kokatzen da.