Alkaiagako industrialdean abuztuaren 16an jokatutako Lesakako VII. Slalomaren ondotik, Ziharka Sport eskuderia buru-belarri ari da bere proba nagusia, irailaren 27an jokatuko den Lesakako Rallysprinta prestatzen. Nafarroako Automobilismo Federazioak antolatzen duen Nafarroako asfalto gaineko Rally txapelketarako baliagarria da proba, baita junior mailako Nafarroako Sariketarako eta Nafarroako Formula Libre (FL) Rallyen Sariketarako ere.
Larunbat goizean itxiko dute Agiñako errepidea eta 12:30ean abiatuko da lehen parte-hartzailea
Hogeita bigarren edizioa beteko du aurten Agiñako errepidean egiten den probak eta ohi bezala, gidariek lau txanda egin beharko dituzte Agiñako errepidean goiti eta beheiti, 9,3 kilometroko ibilbidean (37,2 kilometro guztira). Iraileko azken larunbat goizean, 11:30ean itxiko dute errepidea eta 12:30ean abiatuko da lehen parte-hartzailea. Sari banaketa arratsaldean eginen dute plazan.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.