Lesakako Arrano elkartearen eguna, giro ederrean ospatu dute irailaren 20an, egitarau zabalarekin. Larunbat goiz sargorian, mendi buelta egin zuten Agiñara, oinez eta bizikletaz. Agiñan gosaldu ondotik, berriz ere herrira bueltan, Ekitaldi Artifiziala karrika antzerki berezia izan zuten Harriondoa atarian. Inteligentzia Artifiziala "lagun", dantza parekidea, Maddi Ane Txoperena eta Kattin Madariagaren bertsoak eta giro ederra izan zuten. Txistularien laguntzarekin karrikaz karrika ibili ondorik, Etxalarko asau egileen eskutik bazkaria izan zuten eta 135 lagun elkartu ziren. Bazkalondoan bingo musikatua (zenbakien ordez, euskal musika taldeen kantuen izenburuak asmatu behar izan zuten txarteletan) eta Garazi Migeltorenak kantatu zituen lerroa eta bingoa. Elutxa txarangarekin herrian barrena abiatu ziren, baina ekaitz bortitza lehertu eta aterpeetan babesa topatu behar izan zuten, besta bukatzeko.