Egitarauari dagokionez, larunbatean 11:00etan Aurreskua dantzatuko dute eta ongietorria hurbildutako guztiei. 11:15ean Leitzako dantzariek Ezpata dantza dantzatuko dute. 11:45ean herri kirol saioa hasiko da. Lehenik emakumeak ariko dira arpanarekin, Iruritako Leire Arraztoa eta Antsoaingo Irune Biurrun, Arraiozko Eider Urrutiaren eta Almandozko Nerea Sarratearen kontra. Zortzi ebaki egin beharko dituzte, bi txandatan.
Bi txanden, txinga eramate erakustaldia eginen du Kerman Perez de Herediak, Euskal Herriko txapeldunak, 50 kiloko txingekin.
Aizkoran, Nafarroako, Gipuzkoako eta Bizkaiko emakume eta gizonezko txapeldunak lehia mistoan
Gero, inoiz egin ez den aizkora proba mistoa jokatuko dute Nafarroako, Bizkaiko eta Gipuzkoako gizonezkoen eta emakumeen txapelketetako txapeldunek. Honela, Otsagabiko Iker Vicente eta Berako Nerea Sorondo (Nafarroako txapeldunak), Julen Alberdi Txikia IV.a eta Nerea Arruti (Gipuzkoako txapeldunak) eta Hodei Ezpeleta Bihurri II.a eta Karmele Gisasola Zelai III.a (Bizkaiko txapeldunak) ariko dira. Bikote bakoitzak hamabina enbor moztu beharko ditu: emakumeek lau 45 ontzako eta gizonezkoek zortzi kanaerdiko. 13:00etan pintxoak izanen dituzte eta 14:00etan, Transportes Bidasoako bazkide eta gonbidatuentzako bazkaria.