Komunak eta pankartak errekan agertu ziren atzo goizean Beran, baina kalte gehiago ere izan dira. Eta Berako Txosna Batzordeak txosna inguruan izandako erasoak gaitzetsi nahi izan zituen atzo arratsean. Batzordeak adierazi duenez, «txosnagunea gune segurua dela erraten dugunean, ez gara eraso fisikoez bakarrik ari, gure aldarrikapenak eta besta eredua modu seguru batean plazaratzeaz ari gara, eta beraz, eremu honi eraso egitea, guri eraso egitea da». Erasoak «ez dira txosnagunean bakarrik gertatu», batzordeak gaineratu duenez, «ostatuetan» ere izan dira eta «ekintza horiek guztiek gaur egungo besta eredua zein den zalantzan jartzea eragin du». Irudian ageri denez, Toki Ona institutuaren inguruan ere izan dira erasoak.
«Argi» mintzatu da Berako Txosna Batzordea, «jarrera horiek ez ditugula onartuko» erranez. «Bestak denok ongi pasatzeko dira eta ez matxirulo batzuen eraso gune izateko. Beraz, egoten ez badakizu, ez zara ongietorria». Gehiago ere erran du: «Denon ardura da besta seguruak eraikitzea eta ez ahantzi, erasotzailea babesteak konplize egiten zaitu! Hartu dagokizun erantzukizuna!».