Abuztuaren 14tik 17ra izanen dituzte aranztarrek bestak, eta bestei hasiera emanen dien txupinazoa nork botako duten ere jakina da. Udalak txupinazoa botatzeko hautagaiak proposatzeko aukera eman zien herritarrei, eta horiek bildu ondotik, erabakia jakinarazi du: herriko emakume baserritarrek izanen dute bestei hasiera emateko ohorea.
Horren harira, udalak herriko emakume baserritarrei abuztuaren 14an Herriko Etxera hurbiltzeko deia egin die. 11:00etan egin dute hitzordua.
Herri bazkariko txartelak
Bertzalde, bestetako lehenbiziko egunean, abuztuaren 14an, izanen den herri bazkarirako txartelak ere salgai daude. 40 eurotan herriko ostatuetan erosten ahal dira eta abuztuaren 10a izanen da hondarreko eguna. Joan den urtean bezala, bazkalondoan Trikidantzekin dantzaldia izanen da.