Berako Udalak eta Ehiza eta Arrantza elkarteak elkarlanean, erreka bazterren garbiketa antolatu dute uztailaren 19rako. 09:00etan emanen zaio hasiera auzolanari Altzateko plazan eta hiru talde osatuko dira Bidasoa ondoko ibaibidea, Matzada eta Iturlandetako erreka bazterrak garbitzeko.
Zaborra bildu eta traban dauden enbor eta landaredia kenduko dute. Auzolanean parte hartzeko, izena eman behar da aitzinetik udaleko telefono honetara deituz (09:00-13:30) 94 863 00 05 edo helbide elektroniko honetara idatziz bera@bera.eus. Epea uztailaren 17an bukatuko da.
Zabor bilketarako eskularruak eta oinetako egokiak ekartzea gomendatzen dute. Gainera, tresneria duenak ere eramateko deia egin dute: aihotza, igitaia, aizkora, zerra.... Motozerrak eta sasiak garbitzeko makinak ere beharko dira. Erreminta horiek izan, eta erabiltzeko prest daudenek, izen ematerakoan erran beharko dute. Ekitaldia bukatzeko 13:00etan hamaiketakoa izanen da Ehiza eta Arrantza elkartean.
Berako Udalak herritar denak animatu ditu auzolanean parte hartzera.