Beti Gazteko eta Gure Txokoako zuzendaritza batzordeek adierazi dutenez, «bilerak, deiak, jokalari berriak biltzeko saiakerak eta emakumezko helduen futbolaren aldeko apustua egiten jarraitzeko borondate argia izan arren, talde bat osatzeko eta kirol arloan eta giza arloan denboraldi duina bermatzeko behar den gutxieneko futbolari kopurua biltzea ez dugu lortu».
Berako eta Lesakako klubek aipatu dutenez, emakumezkoen talde bat desagertzea ez da kirol kontua soilik, «galera soziala ere bada. Esperientziaz dakigu emakumezkoen talde batek lehiatzeari uzten dionean, hagitz zaila dela berriro sortu eta martxan jartzea. Horregatik, erabaki hori ez da erraza izan, ezta arinki hartu ere».
Gure Txokoak eta Beti Gaztek eskerrak eman nahi dizkiete «urteetan zehar gure klubetan emakumezkoen taldeen existentzia eta jarraipena ahalbidetu duten pertsona guztiei. Denbora, energia eta konpromisoa eskaini duten jokalariei, entrenatzaileei, ordezkariei, senideei, bazkideei, boluntarioei eta zaleei gure esker ona eta harrotasuna adierazten dizuegu, zuen laguntzarik gabe ezin izanen zen ibilbide guzti hau egin».
Emaitza gorabehera, egindako lanaren balioa aldarrikatzen dute eta «emakumeen kirolak dagokion lekua izan dezan espazioak sortzen jarraitzeko borondatea» berretsi dute Beti Gaztek eta Gure Txokoak: «Etorkizun hurbilean hain beharrezkoa den proiektu bateratu horri berriro ekitea eta gure klubak ordezkatuko dituen emakumezko talde heldu bat berriro martxan izateko baldintzetara iristea espero dugu».