Azken hamar urteetan bezala, Euskal Herriko Unibertsitateak, Uda Ikastaroen barne, Denboraren eragina hizkuntzaren garapenean eta hizkuntza nahasmenduetan izeneko ikastaroa eskainiko du irailaren 19an eta 20an Lesakako Harriondoa Kultur Etxean, Osasunbideak eta Elebilab erakundeak antolatua, Eusko Jaurlaritzako Hezkuntza eta Osasun sailen, Osakidetzaren, Euskarabidearen, Bortzirietako Euskara Mankomunitatearen eta Lesakako Udalaren laguntzarekin. Izena eman daiteke www.uik.eus webgunean. Eusko Jaurlaritzako Hezkuntza sailak eta Nafarroako Gobernuaren Hezkuntza departamentuak homologatutako ikastaroa da eta 20 orduko balio akademikoa du.
Uda Ikastaro hau bi egunetan eginen da. Ikastaroari hasiera emateko, hitzaldi bat eskainiko da, galderak egiteko aukerarekin, eta segidan, 0 eta 6 adin tarteari buruzko aurkezpenak eginen dituzte. Aurkezpen horiek laburragoak izanen dira, eta bukaeran, mahai ingurua eginen da hizlariekin; bertan, hizlariek ez ezik, bertaratutakoek ere parte hartzeko aukera izanen dute. Bigarren egunak 6 eta 16 urte bitarteko tartea hartuko du, eta bortz hitzaldik osatuko dute, aztergai den gaiaren hainbat alderdi jorratzeko. Bukatzeko, 2024ko azken ikasturtean abian paratu diren bi lanen aurkezpen ttiki bana eginen dute.
