Bereziak izaten dira aurten ere Igantzin San Juan eguna eta bezperako suak. Ohiturari segituz, hilaren 23an han-hemenka herri eta auzoetan suen argiak baita jendearen saltoak ere ikusi ziren. Herrian udalak antolatutako San Juan gaueko istorioak ipuin musikatuak izan ziren Itziar eta Amaiaren eskutik; ondotik kuadrilla ederra bildu zen frontoian afari autogestionatuan eta ondotik jendea su saltoan aritu zen izpiritu eta gauza txarrak erre eta hurrengo urterako gorputza eta arima garbitzeko.
Ereiaroaren 24an berriz, San Juan Xarren meza eta bertan gazteak antolatutako ostatuan tragoxka egiteko aukera ere izan zen. Joan-etorriak autobusez egiteko aukera izanik (harat-honatean ibili zen goizean) ez zen bisitarako aitzakiarik. Herrian, berriz, igerilekuen eta Baratzondo Jubilatu Elkartearen 30. urtemuga izanik, dantzak eta aizkora apustuak izan ziren frontoian. Baratzondoko bazkideek, urtero bezala bazkaria egin zuten bertan eta kantu eta musikarekin eman zioten akabaila egunari.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.