Ekainaren 21ean, larunbatean 11:00etan hasiko da Lesakan Beti Gazte elkarteak antolatutako Zubigaineko kros herrikoiaren seigarren edizioa. Lehen aldiz, Bortzirietako Lasterketa Herrikoien Koparako baliagarria izanen da.
Ohi bezala, hamabi zubi zeharkatuko dituen lasterketa Lesakako Herriko Etxearen paretik abiatuko da eta bidean Arretxeko zubia, Koskillako zubia, Moxoren zubia, Periko zubia, Eskol Ttikiko zubia, Itturrunzubi, Antepasetako zubia, Espia zubia, Sumusa, Ekaitzako zubia, Bordieneko zubia eta Pintxeren zubia zeharkatuko ditu. Zarandian izanen du helmuga.
Maila nagusiko eta junior mailako korrikalariek 6.000 metroko ibilbidea izanen dute, kadeteek 3.000 metrokoa, infantilek 1.200 metrokoa, alebinek 900 metrokoa, benjaminek 450 metrokoa, aurrebenjaminek 300 metrokoa eta ttikiek 200 metrokoa. Gizonezkoentzat nahiz emakumeentzat, maila nagusiko lehen sailkatuak 100 euroko saria izanen du, junior mailakoek 60 euroko bonua eta ttikiagoek dominak.