Besten aitzinetik eskaini ohi duen kontzertu berezien haritik, Lesakako Musika Bandaren eskutik Euskal Playlist Irratia emanaldia izanen da ekainaren 20an, ortziralean, 22;00etan hasita udal pilotalekuko aparkalekuan. Euria eginen balu, pilotalekuaren barrenean eginen litzateke kontzertua. Sarrerak 5 eurotan eskura daitezke Lesakako Udalaren webgunean edo herriko etxean (sarrera fisikoa). Bortz urtetik beheitikoak doan sar daitezke.
Mikel Iriarte Pikabearen zuzendaritzapean, Xabi Zabalaren musika moldaketekin eta Paola Oskoz eta Ritxi Abril esatariek gidatuta, Anabel Arraiza, Joli Paskualena, Petti eta Iker Huitzi abeslariak, Kanka taldea, Tantirumairu Euskal Folklore taldeko eta Oinkari dantza taldeko dantzariak, Jone eta Estitxu Elgorriaga trikirilariak, Irain eskolako eta Tantirumairu ikastolako ikasleak izanen dira oholtzan. Emanaldia EITBk grabatuko du eta uda partean emanen du telebistan.