Hartzekodunen Borondatezko Konkurtsoa eskatu du Ternua Group-ek

Ttipi-Ttapa 2025ko eka. 13a, 14:30
Deskargatu Info Ahotsak :
Español English Français Català Galego

Ternua Group-en egoitza Arrasaten.
  • Lau markek osatzen dute Ternua Group: Ternua, Astore, Lorpen (lantegia Etxalarren du) eta Loreak Mendian. Taldearen nahia ekoizpenari eta lanari eustea da. 
  • Goiena.eus-ek eman du berria. Ageri denez, Ternua Group-ek hartzekodunen borondatezko konkurtsoa aurkeztu du gaur Donostiako auzitegian enpresa taldeak duen «egoera delikatuagatik».

Ternua, Astore, Lorpen eta Loreak Mendian markek osatzen dute Ternua Group, eta egoitza nagusia Arrasaten badago ere, Lorpen lantegiaren ekoizpen planta Etxalarren dago. Une honetan, 180 langile ditu taldeak.
 
Lehenik eta behin, zer da Hartzekodunen Borondatezko Konkurtso bat?
Zordunak berak eskatzen du hartzekodunen borondatezko konkurtsoa, ordainketa betebeharrak ezin izanen dituela bete aurreratzen duenean. Horrelako konkurtsoen ezaugarria da zordunak bere finantza egoera modu ordenatuan eta hartzekodunen laguntzarekin konpondu nahi izatea.
 
Hartzekodunen borondatezko konkurtsoa aurkeztu ondotik, Ternua Group-en hitzetan, «konpainia konkurtso administratzaile batek zuzenduko du, eta hark hartuko ditu ekoizpen unitateen etorkizunari buruzko erabakiak, horietatik irits daitezkeen eskaintzei buruzkoak, bai eta taldeko langileei buruzkoak ere», hala ezartzen baitu Lehiaketa Legeak. Helburua da ekoizpenari eta lanari eustea: «Aurkeztutako lehiaketak ekoizpen unitateetako baten eskaintza loteslea dakar berekin, zehazki, Loreak Mendian markarena, eta aipatu epaitegiko magistratuak hilabeteko epean ebatzi behar du eskaintza horri buruz».
 
2023tik «egoera delikatuan»

Goiena.eus-ek argitaratu duen informazioak jasotzen duenez, Ternua Group-ek 34 milioi eurotik gorako diru sarrerekin itxi zuten 2023a, baina emaitza negatiboa izan zen, eta zorra handituz joan da. Nabarmendu dute egoera horri erantzun egin dietela «zorra birfinantzatuz, haren egitura eta gastua optimizatuz, eta inbertsioa eta hazkuntza bultzatuz». Ternua Group-ek zehaztu duenez, 2022ko bigarren seihilekotik kaleko arropen kontsumoan beherakada «nabarmena eta jarraitua» izan du merkatuak. 29,2 milioi euroko fakturazioarekin, emaitza negatiboarekin eta 16 milioiko zorrarekin itxi zuen 2024a.

Azken bortz urteotan gertatutako lau puntu nabarmendu dituzte hartzekodunen konkurtsora aurkezteko arrazoi gisa. Batetik, koronabirusa: Loreak Mendian erosi berritan –2019–, asmoa irabazi handiagoak lortzea bazen ere, osasun krisiak inbertsioa indargabetu zuen neurri handi batean, eta «metatutako stockari eta hornitzaileekin zituzten betebeharrei aurre egiteak zorra handitzea ekarri zuen».

Azaldu dutenez, pandemiaren ondotik, kontsumo ohiturak nabarmen aldatu ziren. Gainera, nazioarteko hornidura katea izan duen krisiaren ondorioz, «kostuak nabarmen igo ziren», eta, gainera, Ukrainiako gerrak inflazioa igotzea eta kontsumitzaileen erosmen ahalmena jaistea ekarri du.

Akziodunak eta langileak
Zuzendaritzak langileen eta akziodunen konpromisoa, ahalegina eta borondatea gogora ekarri ditu: «Familia handia gara, gure lurraldean errotzeko asmo argia dugu, eta gauzak ongi egiteko eta guk duguna baino ondare hobea uzteko konpromisoa dugu. Printzipio ukaezinak dira, eta Ternua Group osatzen dugun guztioi lagundu digute beti». Akziodunei dagokienez, 2010etik egin duten 20 milioi euroko inbertsioa gogorarazi dute, baita irabaziak izan zituzten ekitaldietan beti berrinbertsioa aukeratu zutela ere.
 
Ternua Group-en ibilbidea

Erran bezala, Ternua, Astore, Lorpen eta Loreak Mendian markek osatzen dute Ternua Group. Taldea 2014an sortu bazen ere, Astore eta Ternua ditu hastapenetan.

Import Arrasate enpresaren hiru marka komertzialetako bat da Astore, eta 1989an sortu zen Arrasaten. Enpresa horrek kirol arropa eta harekin erlazionatutako materiala ekoizten du. Aipatzekoa da, bere historian, Euskal Herriko hainbat futbol talderen ekipazioak ekoiztu dituela, baita pilotakoak ere.

1994an, berriz, outdoor arropa munduan murgiltzeko asmoarekin, Ternua marka sortu zuen. 2006an haien oihalak garatzen hasi ziren, eta horrenbestez, nazioarteko merkatuan presentzia indartu zuten. 2010etik Euskal Mendi Federazioarekin lankidetzak egin ditu mendi eskiko-mendi-lasterketetako, eski nordikoko eta alpinismoko selekzioak jantziz.

2014an erosi zuen Ternuak Lorpen enpresa –galtzerdi teknikoak egiten dituen Etxalarko enpresa– eta baita Lorpenek zuen ekoizpen planta ere. Urte horretan bertan Astorek, Ternuak eta Lorpenek Ternua Group osatu zuten. Aipatzekoa da, 2023an Taldeak milioi bat euro inbertitu zituela % 30eko edukiera handitzeko.

Taldera batutako azken enpresa Loreak Mendian izan da. Izan ere, Ternua Group-ek 2019an erosi zuen modako arropak ekoizten dituen Loreak Mendian marka.

Ekonomia Bortziriak Etxalar

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun

Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!