Bigarren izen emate aldi hau aurtengo berrikuntzetako bat da, ikusita aitzineko urteetan lehen epea akabatu ondotik familia aunitzek deitzen zutela interesa agertuz. Hortaz, oraingoan hasierako izen emateekin haur taldeak eta begirale ekipoa antolatu ondotik, soberan gelditu diren plazak eskainiz bigarren izen emate epea ireki du mankomunitateak. Hortik aitzinera ez da izen ematerik eta aldaketarik onartuko.
Aurtengo udalekuetan herri guzietan bi ordutegi izanen dira aukeran: 09:00etatik 13:00etara edo 10:00etatik 13:00etara. Ordutegia izena emateko momentuan aukeratu beharko da eta horren arabera, prezioa ere aldatuko da.
Bertzetik, matrikuletan deskontu sistema aldatu dute: Deskontuak Bortzirietan erroldatuak dauden haurrei bakarrik aplikatuko dizkiete. % 20 deskontua izanen dute guraso bakarreko familiek, familia ugariek edota bi anai-arreba edo gehiago apuntatzen dituztenek; eta % 50eko deskontua izanen dute egoera ekonomiko zaurgarrian daudela egiaztatzen duten familiek. Deskontuak ezin izanen dira pilatu. Ordainketa izena emateko momentuan egin beharko da, txartelarekin, eta epea bukatuta ezin izanen da apuntatu.