Denboraldi bikaina egin du Gotzon Arenas bizkaitar aranztarrak entrenatzen duen Beti Gazteko neska kadete-infantilen taldeak. Lehenengo fasean bi partida bakarrik galdu zituen eta bigarren izan zen, Baztanen gibeletik. Gero, Txapeldunen faseko hamalau partidetatik bakarra galdu zuen (kopako finalean arerio izanen duen Mutilvera taldearen aurka, hain zuzen) eta bertze hamahiruak irabazi zituen. Nagusitasun horrekin irabazi zuen liga: zazpi puntuko aldea atera zion bigarren izan zen Baztani eta 17 puntuko aldea hirugarren izan zen Mutilverari.
Kopan, berriz, final laurdenetako kanporaketa 4-0 irabazi zion Beti Gaztek UCD Burlades taldeari Mastegin. Finalerdietako zozketak Beti Gazteren eta Baztanen arteko norgehiagoka ekarri zuen, ligako lehenaren eta bigarrenaren artekoa, Elizondoko Giltxaurdin. Arauzko denbora banako berdinketarekin bukatu ondotik, penaltietan gailendu ziren lesakarrak. Mutilverak ere penaltiak behar izan zituen CD Mendaves taldea menperatzeko finalerdietan. Orain, finala jokatuko dute Beti Gaztek eta Mutilverak, Faltzesen.