Ekainaren lehenengo asteburuan ospatuko da XXXII. Gasna feria, eta asteburuari izena ematen dion gasna lehiaketak ez du hutsik eginen. Ekainaren 1eko goizean XXXII. Altxata gasna lehiaketa antolatu dute eta inguruko gasna egileek beraien gasnak aurkezteko aukera izanen dute.
Larunbatean Etxakarko VI. Ardi zakur lehiaketa
Etxalarko Bezperan, maiatzaren 31n, 18:00etan, Etxalarko VI. Ardi zakur lehiaketa izanen da errota pareko zelaian. Bortz artzain eta beuren zakurrak etorriko dira: Baigorriko Roger Jauretxe, Pop zakurrarekin; Aldudeko Marzel Hualde (Sua); Etxarriko Jesus Razkin (Mendi); Oronoz-Mugairiko Jorge Oteiza (Lagun); eta Azkoitiko Gaizka Etxaniz (Laster). 22:00etan frontoian, herriko dantzari, musikari eta kantarien ikuskizuna izanen da.
Igandean erakusketak, ardi ile mozte erakustaldia eta gasna lehiaketa
Igande goizean, Iriondoa etxean baserriko lan tresna zaharren erakusketa izanen da, Eskola zaharretan eskulan ikastaroko lanak ikusgai egonen dira eta musika izanen da karrikan. Frontoian, berriz, 10:00etatik 11:00etara lehiaketako ardi gasnen harrera eginen da. Bortziriak, Malerreka, Bertizarana, Baztan, Urdazubi, Zugarramurdi eta Leitzaldean bizi diren artzain edo gasna egileak parte har dezakete. Ardi latxaren esne gordinarekin egindako gasna txapelketa da. Lehiaketarako gasnak gutxienez 60 egunez onduak izan behar dute. Egile bakoitzak gasna bakarra aurkez dezake eta 20 euro ordainduko zaizkio.
12:00etan ardi ile mozte erakustaldia izanen da herritarren eskutik, eta zirian erretako ardikiaren pintxoak dastatzeko aukera ere izanen da. Aurten ez da kantu bazkaririk izanen. Hori dela eta, artisau azokaren ordutegia luzatzea erabaki du Altxatak, baita kopurua ere. 45 artisau postu inguru izanen dira, frontoian, plazan eta karrikan, 10:00etatik 15:00etara. 13:30ean gasna lehiaketako sari banaketa eginen dute frontoian.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!