«28 herri hauetan aldarrikatu nahi duguna gatazkak utzi dizkigun ondorioen konponbidea da, ezinbestekoa da elkarbizitza agertokietara jauzi egin nahi badugu ondorio guzti horiekin amaitzea eta beraz, biolentzia ezberdinen biktimen aitortza eta erreparazioarekin batera ezinbestekoa da euskal preso, iheslari eta deportatuen etxerako bidean urratsak ematea», adierazi zuen Sare Herritarrako Mikel Mundiñanok.
«57 dira oraindik etxerako bidea egiteko oztopoak dituzten euskal presoak eta bide horretan oztopo izaten jarraitzen dute salbuespen lege eta politikak. Oraindik salbuespenezko trataera jasotzen dute euskal presoek eta esanguratsua da lege eta politika arruntak aplikatuko balitzaizkieke euskal presoen %100a etxean egongo litzatekela», aipatu zuen.
Konponbidearen puzzlea osatzea helburu eta aldarri izan dute bi egun hauetan, herriek oraindik puzzlean kokatzeko falta zaizkien piezak puzzlean kokatzea da helburua eta «lanean jarraituko dugu euskal gizartearekin batera euskal preso guztiak etxerako bidea egin dezaten».