Hainbat lan egin dituzte Beran Next Generation funtsek finantzatuta

Ttipi-Ttapa 2025ko mai. 5a, 10:30

Frantxia Haltzuet plazan eraikitako komun publikoa.

Europar Batasunaren Next Generation funtsek finantzatuta hainbat proiektu gauzatu dituzte azken asteetan. Lanak %100ean finantzatu dira funts horiei esker, eta udalak ez du inbertsiorik egin behar izan. 

Baztan-Bidasoa: Tokiko Merkataritzatik Komunitatea Egiten proiektuaren 12. lotearen barrenean, Illekuetako Frantxia Haltzuet plazan komun adimendua paratu dute. Dagoeneko erabilgarri dago komuna, eta lanek 49.351,37 euroko kostua izanen dute.  Proiektu berean Kanttonberri eta  Altzate  karriketan eta Altzateko plazan wifi sare librea paratu dute.  Lanek 6.860,31 euroko kostua izan dute BEZa barne.

Argiteria publikoa berritua

Argiteria publikoa ere berritu dute Legia, Kanttonberri eta Altzate karriketan eta Altzateko plazan. Argiteria publiko adimenduna paratu dute, kontsumo ttikia duena. Lan horiek Baztan-Bidasoa: Tokiko Merkataritzatik Komunitatea egiten proiektuaren 13. lotearen barrenean egin dituzte 98.251,39 euroko inbertsioa eginda.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun