Apirilaren 11n egin zuen bilera Etxalarko Altxata kultur eta kirol elkarteak mendi itzulian laguntzaile arituko diren boluntarioekin. Lan banaketa eginda, eta azkeneko gauzak itxita, dena prest daukate etxalartarrek maiatzaren 3ko seigarren ediziorako.
Aurten ere bi ibilbide izanen dira aukeran: ibilbide motza (23,4 km eta 1.262 metroko desnibela) eta ibilbide luzea (31.2 km eta 1.862 metroko desnibela). Aitzinetik izena eman daiteke inscripciones.nafarmendi.org helbidean baina egunean bertan 06:30etik 08:00etara ere eman daiteke izena frontoian (15 euro). Bi ibilbideen irteera 07:30etik 08:30era izanen da plazatik.
Argazki lehiaketa ere
Argazki lehiaketa ere izanen da aurtengo bereizgarri. Itzulian ateratako argazkiak Altxatari bidaliz gero, argazki lehiaketan parte hartuko da, sari bikainak lortzeko aukerarekin. Horrez gain, mendi itzuliko kamiseta eskuratzeko aukera izanen da. Kamiseta aitzinetik lortu nahi duenak, eskuragarri dauzka Kultur Etxean, astelehenetik ortziralera 16:00etatik 19:30era. Informazio gehiagorako www.altxata.org.
