Nafarroako Gobernuko Kultura Zuzendaritza Nagusiak DNA-Nafarroako Dantza Garaikidearen 2025. edizioa aurkeztu zuen martxoaren 31n, Baluarte Fundazioarekin elkarlanean garatutako programa, sorkuntza artistikoa sustatzea eta dantza garaikidea Nafarroako publikoari hurbiltzea helburu duena. Eskualdean, Lesakan izanen du geltoki, igandean Erain dantza konpainiak Harriondoa kultur etxean eskainiko duen Sin fichero adjunto proiektu artistikoarekin eta Led Silhouette taldearen ‘Ultimatum’ erresidentzia artistiko berriarekin, abuztuan.
Hain zuzen, Led Silhouetteko Martxel Rodriguezek Ttipi-Ttapari adierazi dioenez, «abuztuan sortzen hasiko gara Ultimatum Lesakan eta heldu den urteko apirilean estreinatuko da, suerte pixka batekin etxean lehenbiziko eta ondotik, Gaiarren, Gasteizen, Valentzian, Katalunian…».