Mikel Irujo, Nafarroako Gobernuko Industriako eta Enpresen Trantsizio Ekologiko eta Digitalerako kontseilaria Berako Zalain industrialdean dagoen enpresaren instalazioetan izan da. Martikok departamentuaren 200.000 eurotik goitiko laguntzak hartu ditu eta liderra da ahate eta arrain ketuaren ekoizpenean.
Bisitan, kontseilaria lantegian ibili da, eta Joseba Martikorena zuzendari nagusiaren eskutik ezagutu du Martikoren historia eta bilakaera, 1986an sortu zenetik, eta «nekazaritzako elikagaien sektorean kalitatearekin, jasangarritasunarekin eta berrikuntzarekin duen konpromiso sendoa, erreferente bat», nabarmendu zuen.
Martiko taldea Martiko, Xantelmar, Lerin nekazaritza eta abeltzaintza eta Navarplumak osatzen dute, eta berrikuntzaren eta zirkulartasunaren aldeko apustua egin du, zutabe estrategiko gisa, 2007tik aurrera Nafarroan etxalde propioa garatuz eta elikagaien trazabilitatean erreferente gisa sendotuz. «I+G+B arloan duen ikuspegiari esker, enpresa nazioarteko merkatuetara hedatu da, 30 herrialde baino gehiagotan presentzia izan du, eta nazioartekotzearen Alimenta Navarra 2018 saria bezalako aintzatespenak hartu ditu», adierazi zuen Irujok.
450 langile Nafarroan
Joseba Martikorenak aipatu zuenez, «gure salmenten %30 kanpoan ekoizten da eta gaur egun talde osoak 450 langile ditu Nafarroan». Martikok Nafarroako nekazaritzako elikagaien sektorean bikaintasunarekin eta berrikuntzarekin duen konpromisoa berresten du; izan ere, orain dela gutxi Sabor del Año 2025 zigilua jaso du, premium izokin ketuaren gamagatik.
Produktu berrikuntzari dagokionez, Joseba Martikorenak hau adierazi zuen: «Basque Culinary Center (BCC) sortu zenean, patrono sortzaile bihurtu ginen. Hala itxi zen zirkulua, eta sukaldari ospetsu haiei hasieratik gurekin egin zuten ahalegina eta bidea itzultzea lortu genuen. Martikorentzat berrikuntza gure markaren etorkizunerako funtsezko pieza dela sinetsita sartu ginen BCCn».