20 kilometroko ibilbidea osatzen lehenbizikoa Txantreako Ioar Tabar Clemente izan zen. Ordu batez, 44 minutuz eta 23 segundoz ailegatu zen helmugara. Minutu bateko eta 53 segundoko tartea atera zion bigarren helmugaratu zen Oihan Sayar Gartzia irundarrari, eta Jokin Arretxea Lastiri narbartearrak osatu zuen gizonezkoen podiuma, irabazlearengandik bi minutu eta 51 segundora.
Emakumezkoetan, berriz, Leire Elola Izagirre tolosarra izan zen bizkorrena. Bi ordu, hamar minutu eta 37 segundo behar izan zituen 20 kilometroko lasterketa egiteko. Handik guttira ailegatu zen Ane Elzaurdia Mentaberri beratarra, 39 segundora. Emakumezkoen podiuma Fani Irubetagoienak osatu zuen.
Ekaitza Elkartearen izenean, Mattere Pagolak eta Eli Iturriak eman zizkieten sariak. Irabazleek txapela, oroigarria, 150 euro eta lore sorta hartu zituzten; bigarren gelditu zirenek oroigarria, 100 euro eta lore sorta eta hirugarrenek oroigarria 80 euro eta lore sorta.
Xabier Zubieta Saria
Ekaitzako kaskotik pasatu ziren lehenbiziko Bortzirietako emakumezko eta gizonezko lasterkariek Xabier Zubieta Saria hartu zuten. Dani Iparragirre Iturria aranztarra eta Ane Elzaurdia Mentaberri izan ziren bizkorrenak. Xabier Zubieta zenaren seme-alabek, Aimarrek eta Loreak, eman zieten saria Iparragirreri eta Elzaurdiari.
Horrez gain, lasterketan parte hartu zutenei opariak eman zizkieten, eta haien artean zozketak ere egin zituzten.
Bertzalde, proba Nafarroako Koparako puntuagarria izan zen eta eskualdeko 61 lagunek egin zuten Arantzako lasterketa.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!