Ortziralean Hernaniko Kontrakantxa gaztetxean aritu ziren Kattin Madariaga aranztarra eta Enara Gallastegi, Ekhi Zuluaga eta Gorka Pagonabarraga eta Danel Etxeberria eta Janire Arrizabalaga. 60 lagun bildu ziren saioa aditzera, eta Zuluagak eta Pagonabarragak lortu zuten zuzeneko txartela finalaurrekorako.
Larunbatean, berriz, 100 lagun inguru bildu ziren Altsasuko gaztetxean sei bertsolarien jarduna aditzeko. Haira Aizpurua saratarra Nahia Etxeberrirekin aritu ziren kantuan, Elixabet Etxandi eta Eukene de los Aires, eta Aitor Tatiegi eta Suhar Gesalaga bertsolariekin batera. Saioa bukatuta, azken bikoteak lortu zuen finalaurrekotarako txartela.
Eskualdeko bi bertsolariek finalaurrekoetara zuzeneko sailkapenik lortu ez badute ere, oraindik badute sailkatzeko aukera. Izan ere, kanporatutako bi bikote aukeratuko dituzte hurrengo fasean kantatzeko. Horretarako, Gaztetxeak Bertsotan sariketako Instagram kontuan eman behar da bozka.
Martxoaren 27an jokatuko dute lehen finalaurrekoa Bilboko 7katu gaztetxean, eta apirilaren 10ean, bigarrena Gasteizko gaztetxean. Unax Aizpurua saratarra dagoeneko sailkatua da Aroa Arrizubietarekin batera kantatzeko.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!