Euskal Herriaren eta Kataluniaren arteko senidetze jaialdia eginen dute Lesakan larunbatean

Ttipi-Ttapa 2025ko ots. 20a, 10:00

Xics de Granollers casteller taldeko kideak senyerarekin eta ikurriñarekin 2023ko urrian Lesakako plazan. Berriz ere Kataluniaren eta Euskal Herriaren arteko senidetzea indartzeko jaialdia antolatu dute otsailaren 22rako.

CalçTxotx! 2025 goiburupean, txaranga, poteoa, bazkaria, bertso glosa saioa eta Euskal Herriko eta Kataluniako musika taldeekin kontzertuak izanen dituzte

Euskal Herria eta Kataluniaren arteko senidetzea helburu duen jaialdia antolatu du Lesakako udalak otsailaren 22an, Calçtxotx! 2025 goiburupean.

Egitarauari dagokionez, larunbat honetan 12:00etan txaranga ibiliko da eta poteoa eginen dute. 14:00etan bazkaria eginen dute Plaza Zaharrean. Egunaren goiburuak dioen bezala, Katalunian ohikoak diren calçotak eta Euskal Herriko txotxeko sagardoa izanen dira menuko oinarria. Euria eginen balu, udaletxeko arkupeetan eginen litzateke bazkaria.

Bazkalondoan, 16:30ean, bertso glosa saioa eginen dute eta 18:30ean kontzertua izanen da Lesakako Hago Silik rock taldearekin eta Kataluniako Alt Empordàko The Rural Kids oi! taldearekin.

Gizartea Bortziriak Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun