Eguraldi kaxkarra egin bazuen ere, Gurekin Lesakako Zerbitzuen Elkarteak antolatutako Eguberrietako Azoka arrakastatsua izan zen abenduaren 6an. Lesakako elkarteko komertzio eta eskulangileek beraien produktuak karrikara atera zituzten eta Arrano, Koxkilla, Zantzonea eta jubilatuen ostatuetan ere pintxoa opari izan zuten bezeroek. Iñurri elkartearen aldeko Tantirutalo postuan ere mugimendu handia izan zuten. Azaroaren 15etik abenduaren 4ra egindako erosketen truke, Berako B. Travel bidaia agentzian 600 eurotan baloratutako opari txartela Ritatxo Gartziari egokitu zitzaion.
Zahar Etxerako erregetako opariak egiteko saskien zozketa abenduaren 20an
Horretaz gain, Gurekin elkarteak Andra Mari zahar etxeko egoiliarrei erregetako oparia egin ahal izateko saskiak prestatu ditu eta horien zozketarako txartelak 2 eurotan salgai paratu zituen. Berez, abenduaren 31ra bitarte saldu eta urtarrilaren 3an egitekoa zen zozketa, baina txartel guziak ortziraleko azokan bertan saldu direnez, aitzineratu eta ortzirale honetan, abenduaren 20an eginen dute zozketa.