Disko Golfeko Espainiako Kopa ere irabazi du Baxi Basajauna taldeko Iñaki Gonzalezek

Ttipi-Ttapa 2024ko aza. 16a, 11:00

Baxi Basajauna taldeko Iñaki Gonzalez Olaizola Espainiako kopa irabazi ondotik Madrilen, podiumean lagun izan zituen Javier del Riegoren eta Toni Barrientosen artean.

Azaroaren 9an eta 10ean Madrilgo Complutense zelaian Intermad4.0 txapelketa jokatu zen. Espainiako Disko Golf Kopako torneoa izan da, 2024ko kopako azkena eta 2025eko Koparako ere baliagarria izan da. Igantziko Baxi Basajauna taldeko Iñaki Gonzalez Olaizolak lehen postua lortu zuen MP50 kategorian eta horrela, aurtengo Espainiako Kopa ere irabazi du. Beraz, aurten "dobletea" egin du, Espainiako Kopa ez ezik, Espainiako Txapelketa ere irabazi baitzuen urrian.

Baxi basajauna taldeko Toni Negretek laugarren postua lortu zuen kategoria berean eta Lekunberriko Rafa Sarriegik MPO kategorian 3. postua lortu zuen.

Hurrengo urteari begira

Aurtengo konpetizio gehienak burututa, datorren urteari begira daude duen Baxi Basajauna elkarteko kideak. Honela, Igantziko Irrisarrik hartuko du Espainiako Koparako baliagarria izanen den Nafarroako V. Disko Golf Irekia. Maiatzaren 2an, 3an eta 4an jokatuko da, eguneko txanda bat.

Horretaz gain, aipatzekoa da Espainiako Disko Golf Elkartea (AEDG) Espainiako Disko Hegalari Federazioan sartuko dela (FEDV) eta, gisa horretara, orain arte ez zuen kirol kategoria ofiziala hartuko du disko golfak.

Kirola Bortziriak Igantzi

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun