Gurekin Lesakako Zerbitzuen Elkarteak bezeroen fideltasuna eskertzeko kanpaina abiatu du, Lesakako Udalaren laguntzarekin. Honela, azaroaren 15etik abenduaren 4ra arte egiten dituzten erosketen truke, Berako B. Travel bidaia agentzian, 600 eurotan baloratutako bidaia baterako opari txartelaren zozketan sartuko dira (izen-abizenak eta telefonoa txartel batean apuntatu eta kaxa batean sartu beharko dute). Zozketa Eguberrietako Azokan eginen dute.
Eguberrietako azoka abenduaren 6an
Eguberrietako Azoka abenduaren 6an, ortziralean 10:00etatik 18:30era eginen dute. Intzuri, Pittin, Kattagorria, Amura, Txirula, Txinelka, Ortzadar eta Comercial Maria Jesus komertzioek paratuko dituzte postuak eta bezeroek, erosketarekin batera, Arranon, Koxkilan, Zantzonean eta Jubilatuen Ostatuan pintxoa opari izanen dute. Elkarteko postuez gain, Lesakako artisauek ere paratuko dituzte bere salmahaiak, baita Tantirutalo postu solidarioa ere, Izan Iñurri elkartearen alde.