Aurten 90 bat pilotarik parte hartuko dute Bortzirietako Pilota Eskolan, horietarik gehienak haurren kategorietan. Txikien, umeen, kimuen eta haurren artean 80 pilotari izanen dira. Horiekin batera, trebatze saioak gidatzen zazpi begirale ariko dira.
Gainerakoan, zortzi lagunek osatzen dute antolakuntza taldea, eta hainbat ardura dituzte: begiraleen arduraduna eta federazioarekin harremana, materiala eta dirulaguntzak lortzeko bi lagun, hiru lagun partidetan epaile lanak egiteko, ostatuaren arduraduna eta diruzaintzaren arduraduna.
Joan den ortziraleko hitzorduan, pilotariei aurtengo jantziak banatu zizkieten, baita taldeko argazkia atera ere. Kamiseta zuriak Biok etxearen laguntzari esker egin dituzte eta jertseak Korta Anaiak eta Tec mac enpresen laguntzarekin.