Hamargarren urteurrena bete dute aurten Euskal Herriko Unibertsitateko udako ikastaroen barne Lesakan antolatzen den haurren garapenerako ikastaroek. Aurtengoan, hizkuntza nahasmenduak haur elebidunen garapenean izan dute hizpide asteburu honetan Harriondoan eta 18 hizlari izan dituzte. Osasunbideak eta Elebilak erakundeak antolatu dute ikastaroa, Eusko Jaurlaritzako Hezkuntza eta Osasun sailen, Osakidetzaren, Euskarabidearen, Bortzirietako Euskara Mankomunitatearen, Bortzirietako Guztiok elkartearen eta Lesakako Udalaren laguntzarekin.
Jardunaldi hauen sustatzaile den Belen Compainsek aipatu duenez, «hamar edizio hauetan 118 ponentzia aurkeztu dituzte 98 hizlarik eta denera, 500 bat lagunek parte hartu dute ikastaroetan. Aurtengoa berezia izan da, 18 hizlari izan baitira, inoiz baino gehiago. Ortziralean familiekin mahai ingurua egin genuen eta gero tailerra, baita Ameriketako Estatu Batuetako zentro batekin konexio bat ere».
Heldu den urteko ikastaroari begira daude dagoeneko.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.