Irailaren 13an, ortziralearekin hasiko dira Etxalarko Urritzokieta auzoko santakruzak eta urtero bezala, egitarau polita osatu dute auzotarrek. Hasteko, txupinazoaren ondotik, 17:00etan txokolate beroa eskainiko dute Sainduneko zubian eta iluntzean zingar jatea izanen dute.
Irailaren 14a, larunbata, egun handia izaki, 12:30ean luntxa eskainiko dute auzotarrek ermitako atarian eta ondotik meza izanen da 13:00etan. Zer gozatua izanen da eguerditik aitzinera ere: Asaua, mus eta partxis txapelketa, herri kirolak… 20:00etatik 22:00etara ogitartekoak izanen dituzte, 22:00etan kontzertua eta egunari akabera emateko auzoko DJ-ak paratuko du musika.
Irailaren 15ean, igandearekin, bukatuko dira bestak; 13:00etan meza izanen dute Santa Krutz ermitan eta arratsaldean desmuntatze eta txukuntze lanak eginen dituzte. Horiek ere behar beharrezkoak dira, besten ondotik auzoa txukun txukun uzteko.