Parte hartzaileek bi irteera izanen dituzte aukeran. Bietan errazena Gavarnie herritik aterako da Bujarueloko lepora igotzeko. Denera lau ordu inguruko ibilbidea eta 600 metroko desnibela izanen ditu.
Bigarren irteera, aldiz, mendizale zailduagoentzako izanen da. Col de Tentesetik aterako da, Bujaruelotik pasa eta Sarradetseko aterpetxera ailegatzeko. Bertatik, Errolanen Bretxan barrena Taillonera igoko dira. Itzulera bide berdinetik eginen dute, eta ibilaldiak denera 6 ordu inguruko iraupena eta 1.200 metroko desnibela izanen dituela kalkulatu dute. Ondotik, bazkaria izanen dute denek elkarrekin.
Ondotik, bi martxetako partaideak Bujaruelon elkartuko dira, Taillonen zendutako Loro Pikabea, Xabier Zubieta eta Xabier Saralegiren omenezko monolitoan. Omenaldiaren ondotik, Gavarnie herriaren ondoan bazkaria eginen dute.
Txangoa 05:30ean aterako da Berako Iamotenea pareko aparkalekutik eta ilunabarrean ailegatuko dira bueltan Berara. Prezioa 30 eurokoa da, eta autobus bidaia, asegurua eta bazkaria daude barne.
Izen emateak mugatuak dira eta Agerrako Pikabea Harategian egin behar dira. Izena emateko orduan izena, abizena, telefono zenbakia eta NAN eman beharko dira.