Lesakako musika bandak Sorginxuloko Oihartzunak izeneko kontzertua emanen du udal pilotalekuan ekainaren 23an, igandean 12:00etan. Hasiera batean Eskol-Ttikiko aparkalekuan egitekoa zen, baina eguraldi iragarpena dela eta, frontoian izanen da. Emanaldiaren oinarria musika banda izanen bada ere, herriko bertso eskolako bertsolariek, dantzariek, txistulariek, soinulariek, trikitilariek, Lesakako abesbatzak, Leitzako Jeiki abesbatzak eta gaiteroek ere parte hartuko dute.