Dantzari ttikien bilgune bihurtuko da berriz ere Bera larunbatean, Gure Txokoa Dantza Taldeak ekainaren 1erako antolatu baitu aurtengo Dantzari Ttiki Eguna. Herriko dantzari ttikiez gain, Lezoko Murixka, Zaldibiako Iztueta eta Tolosako Udaberri taldeetako haurrak etorriko dira herrira.
Goizean ailegatuko dira haurrak Berara eta 10:30etik aitzinera herriko hainbat auzotara joanen dira dantzariak hainbat taldetan banatuta. Hamaiketakoa egin, eta bueltan, 12:30ean dantza jaialdia eginen dute. Eguraldi ona bada Merkatu plazan elkartuko dira, eta txarra bada, aldiz, Eztegara pilotalekuan. Jaialdian dantzari denak ariko dira.
Dantza jaialdiaren ondotik, kanpoko dantza taldeetako haurrak Berako haurren etxeetara joanen dira bazkaltzera, eta eguna borobiltzeko, 16:00etan denak elkartu eta dantzaldia izanen da Jaiki Hadi taldearekin.