Mendi Maratoi Erdirako 525 dortsal paratuko dituzte eskuragarri 15:00etatik aitzinera esteka honetan, eta dortsalak agortzen ez badira, izen-ematea apirilaren 10ean itxiko dute. Inskripzioaren prezioa 33 eurokoa izanen da korrikalari federatuentzat eta 35 eurokoa federatu gabeentzat.
Berako Mendi Maratoi Erdia Nafarroako Mendi Lasterketen Zirkuituan sartua dagoen proba da. Zirkuituak 22 proba ditu, eta Berakoa baliagarria izango da Nafarroako rankingerako. Zirkuituko lasterketa guztiak puntuatuko dituzte, eta ekainean eta abenduan sariak emango dituzte erregulartasuna saritzeko.
Gazte Trail probari dagokionez, izen ematea orri berean egin beharko da 7 euroren truke.
Edalontzirik ez hornidura postuetan
Berritasun gisa, aurten ez dute plastikozko edalontzirik emanen maratoi erdiko hornidura postuetan. Lasterketak hartzen duen inguru naturalean ahalik eta plastiko gutxien erabiltzeko, parte hartzaile bakoitzak bere edalontzia eraman beharko du. Antolatzaileek azaldu dutenez, «mendiko lasterketetan gero eta ekimen iraunkorrago eta arduratsuagoen alde eginen dugu lan».