Korrika nagusia hasi aitzinetik, furgonetako gidariak prestatzeko Korrika Perpendikularra delakoa egin ohi da, hamaika egunez, Euskal Herrian barna dabiltzan bitartean gertatzen ahal denerako prest izateko. Aurten, Arantzan eginen dute eta aranztarrek KorrikArantza izena paratu diote.
Martxoaren 10ean, 17:30ean hasiko da KorriKarantza, Aterpe paretik. Hortik abiatuta, berriz herrira ailegatu aitzinetik, Bordalarrea auzoan barna buelta eginen dute euskararen alde lasterka. Tarte horretan, Arantzako hainbat eragileren eta herritarren eskutatik pasatuko da lekukoa: haurrak, gazteak, gurasoak, jubilatuak, elkarteetako eta erakundeetako ordezkariak, kirolariak, musikariak, dantzariak, feministak... KorrikArantza bukatuta, ekitaldia eginen dute plazan.
Bazkarirako izen ematea
Ez da eguneko hitzordu bakarra izanen. Egun horretan, herri bazkaria antolatu dute Aterpean, eta joan nahi dutenek martxoaren 2a baino lehen izena eman beharko dute. 678 03 50 16ra edo 665 73 77 78ra idatzi beharko da izena emateko.
Bezperan gehiago
Asteburu bete-betea izanen dute martxoko bigarrena Arantzan, eta KorrikArantzaren bueltan, martxoaren 9an, bi bakarrizketa izanen dituzte:
- 13:00etan bakarrizketa antolatu dute Aterpeko lagunek Aterpean: Antton Telleria, Iker Plazaola eta Asier K ariko dira.
- 19:090etan bakarrizketa izanen da eskolako gimnasioan: Erdaldun berrien kluba. Bortzirietako Korrika Batzordeak antolatu du.
Horietaz gain, martxoaren 15ean Bizkarsoro filma ikusteko aukera izanen da Arantzan.