2023ko argazki lehiaketako saridunen berri eman du Lesakako Beti Gazte elkarteak. 114 argazki aurkeztu dituzte aurten lehiaketara eta epaimahaia Irungo Oskar Gaskon, Gasteizko Oskar Manso eta Elizondoko Iñigo Zaldua argazkilariek osatu dute.
Castallako (Alacant) Vicente Guill Fuster-en Paseos argazkiak eskuratu du 400 euroko sari nagusia.
Bigarren saria, 300 euro, Jerez de la Fronterako (Kadiz) Francisco Javier Dominguez Garciaren Escaparate en movimiento argazkiak lortu du.
Kirol argazkirik onenaren 250 euroko saria Donostiako Jose Angel Amutxastegi Esnaolak lortu du, Santa Clara argazkiarekin.
Beti Gazteko bazkide batek ateratako argazki onenaren 250 euroko saria Fidel Ordoki Fagoaga lesakarrak eskuratu du, Kopan argazkiarekin.
Erakusketa
Egun hauetan lehiaketara aurkeztutako argazki guztiekin egindako erakusketa ikusgai izanen da abenduaren 23tik aitzinera Plaza Zaharreko 27an, Marisonean. Beti Gazte elkartearen webgunean ere (www.betigazte.net) ikus daitezke argazki sarituak eta finalistak.