Zazpi bat urterekin hasi zen Aldabe pilotan herrian eta 12 urterekin Berara joan zen, 14rekin Doneztebera eta 21ekin Iruñeko Oberena klubera. Garfe enpresan ere ibili da igantziarra. Urteotan hainbat garaipen eskuratu ditu, eta horien artean nabarmentzekoa da aurten munduko txapeldun izan dela eta Josetxo Etxandi Lezoko torneoa ere irabazi duela. 2021ean, berriz, Biharko Izarrak pilota txapelketan txapela jantzi zuen.
Kontatu duenez, ilusioz hartu du erronka: «Afizionatuetan txapelketa aunitz jokatu ditut, baina abenduaren 8tik aitzinera espero dudana diferentea da. Erronka ilusionagarria da». Gehiago ere onartu du: «Niretzat pilota nire bizitza izan da eta nire bizitzako momentu aunitz eskaini dizkiot». Eta hala, argi du zein izanen diren bere lehentasunak hemendik aitzinera: «Jokin Etxanizen eskuetan jarri nahi dut ahalik eta gehien hobetzeko eta profesionalen partidetan maila ona emateko».