Berez, San Martin da Lesakako zaindaria eta besta eguna izan ohi da azaroaren 11. Egun horretarako ohiko emanaldia izan behar zuena, Mikel Iriarteri omenaldia eskaintzeko eguna bihurtu zuen Lesakako musika bandak. Ezustean, plazan aurreskua dantzatu zioten zuzendariari Ioritz Iriarte bere semeak eta Leire Igoa bandako kideek. Ondotik, karrikaz karrika ibili zen musika banda, Mikel Iriarte zuzendari zutela eta bazkaria izan zuten Kasinoan. Musika bandako kideez gain, bertze musikariak ere gonbidatu zituzten ekitaldira, tartean musika bandarekin hainbatetan jo duen Xabier Zabala musikari ezaguna.
