Aitzineko urteetan, Iñaki Perurena, Xabier Euzkitze, Xabier Agote, Toti Martínez de Lezea, Aizpea Goenaga, Itziar Sistiaga, Julian Iantzi, Pilar Otegi eta Ignazio Carrillo eta iaz, Mikel Urdangarin izan dira txondorra pizteaz arduratu direnak.
Txondorra eraikitzeko, aurten inguruko basoko 18.000 kilo egur erabili dituzte, bereziki gaztainondo eta haritza. Larunbatetik aitzinera, borondatez jendea arituko da txondorra zaintzen hilabetez eta urte bukaerarako ikatza izatea espero dute. 5.000 kilo ikatz lortzea espero dute, azken urteetan bezala jatetxeko parrillan erabiltzeko datorren denboraldian.
Larunbat honetatik aitzinera eta abenduaren 30era bitartean ikaztegia bisitatu ahal izanen da, bertan dagoen museoarekin batera. Bertan, garai bateko ikazkinen bizitza estiloa eta lan egiteko modua ikusi eta ikasi ahal izanen da. Horretarako espresuki egina dagoen ibilbidea ere egin daiteke eta trenez ikusi guztia.
Musika emanaldia
Txondorraren piztuerarekin batera musika emanaldi bikainak izanen dituzte larunbatean Irrisarrin. Batetik, Caroline Collier Iruñeko Sinfoniettako zuzendariak eta orkestrako hiru musikarik emanaldia eskainiko dute txondorraren inguruan. Bertzalde, Gorka Zabaleta kantautoreak ere bizpahiru abesti kantatuko ditu gitarrarekin batera. Azkenik, Zubietako Joaldunak ere bertan izanen dira, joan den urtean bezala.
Olentzero eta Mari Domingi abenduaren 16an
Abenduko hirugarren larunbatean, abenduaren 16an, Olentzero eta Mari Domingi egun osoan izanen dira IrriSarri Landen, haurren eskutitzak hartzen.