Sustantzien kontsumoaren inguruan Bortzirietako Gizarte Zerbitzuen Mankomunitateak esku artean duen lanketaren barrenean antolatzen du Bestabusa zerbitzua. Finantzazioa erabiltzaile orok joan-etorria bortz euro ordainduta eta Agenda 2030 deialditik hartutako diru laguntzarekin egiten dute. Aurtengoan, gainera, dirulaguntza handiagoa hartu dutenez, eskaintza zabaldu dute, eta hala, gizarte zerbitzuetatik adierazi dutenez, «Bortzirietako arratseko besta gehiagotan zerbitzua eskaintzearekin bat, erabiltzaileek etxerako itzulera segurua egiteko aukera handiagoa izan dute». Zerbitzu honen oinarrian «kontsumo arduratsua sustatzeaz gain, autoa hartzeko aukera saihestea» dagoela oroitarazi dute.
Zerbitzu honetaz gain, bertzelako esku hartze prebentibo eta hezigarriak ere egin ditu mankomunitateak: gurasoentzat hitzaldiak, nerabeekin tailerrak, arreta indibidualaren zerbitzua...