2021eko otsailaren 20an piztu zen sutea eta denera 1.400 hektarea erre zituen, horietatik 672,5 Nafarroan, Beran eta Lesakan, 277,5 Gipuzkoan eta 430,87 Lapurdin.
Egindako begizko ikuskapen tekniko polizialei eta herritarren laguntzarekin lortutako sutearen hasierako uneen argazkiei esker, nahita piztutako sutea izan zela baieztatu zuten ikertzaileek. Bi hasiera puntu zituela baieztatu ahal izan zuten, eta bi hasiera puntuak errepidez lotuta zeudela 647 metroko distantziarekin.
Lekukoen testigantzei eta segurtasun-kameren eta telefono-komunikazioen trafikoaren azterketari esker, foruzainek Espainiar estatuan aurrekari judizialak dituen eta gaur egun Frantzian bertze delitu batzuengatik zigorra betetzen ari den frantziar nazionalitatea duen herritar bat identifikatu zuten, sutearen egilea izan zitekeelakoan. Horren ondorioz, Instrukzioko epaileak deklarazioa hartu zion ikertu gisa.
Instrukzio epaileak autoan dioenez, «ikerketa-eginbideen eta eskura dauden informazioen ondorioz, bateragarriagoa da erruztatze-hipotesia errugabetzea baino». Hala ere, instrukzioa behin-behinean gelditzea eta auzia artxibatzea erabaki du. Autoan zehazten duenez, «beharrezkoa da egitateak aukera hutsa baino gehiago izatea, ziurtasun bat egon behar du, eta ikertutakoak egindakoa ez da nahikoa delitu-egitatea justifikatu ahal izateko».