Hori dela eta, eskaintza zabala dute; «helduentzako ziklo, zumba, GAP, pilates, gimnasia egokitua… gainera, material berria ekarri dugu eta crosstraininga eta entrenamendu funtzionala egiten hasiko gara».
Gainera, «aurten bereziki haur eta gaztetxoendako kirolari bultzada eman nahi diogu, ohiko kirolez gain, bertze kirolak proba ditzaten. Horregatik, Eskola kirolaz gain, Gazte kirola (10-12 urtekoentzako) eskainiko dugu kirol desberdinekin, eta Gazte fitnessekin jarraituko dugu (12-16 urtekoentzako) egokitutako entrenamendu funtzionala probatzeko gimnasioan eta bertze gelatan».
Adindunek ere badute egokitutako gimnasia egiteko aukera, «adin edo ohiturei moldatua. Hagitz talde eta giro ona sortu dira eta aurten jarduera berriak sartzeko asmoa dugu; dantzak, mendiko bueltak… haien gustura». Izan ere, «hagitz garrantzitsua da zahartzaro aktiboa izatea, eta hemendik lan haundia egiten ahal dugu horren alde. Taldean aritu nahi ez dutenak bakarka ere etortzen ahal dira gimnasioan aritzeko, eta guk laguntza emanen diogu».
Errutina osasuntsua mantentzeko «konstantzia» da inportanteena, «hasten dena segitzea eta ohitura bat hartzea. Gustukoa duzun aktibitatea aurkitu behar duzu, eta zure egunerokotasunean sartu».
Kirola egiten hasi nahi dutenak «kiroldegira hurbiltzera animatuko nituzke, lotsarik gabe probatzera. Hainbat aukera ditugu, edozeini egokitzen ahal direnak, eta jendeak bere araberako aktibitateak egiten ditu; taldeka, banaka, monitoreen laguntzarekin… etorri eta probatu. Norberak bere mailan zerbait egiten ahal du beti».